CMB a honra nos Heroenan di prensa deportivo

Un anochi historico por califica e evento cu CMB a organisa pa reconoce e heroenan di prensa deportivo di nos Isla. Caribbean Mercantile Bank conhuntamente cu Museo di Deporte a dicidi e aña aki pa durante di Copa di Europa honra esnan cu ta sacrifica hopi di nan tempo liber pa cubri eventonan deportivo y promove nos deportistanan y deporte en general.

For di oranan di merdia Cadochi Kock y su team di ATV cu Amado Rosina y Verio Emerenciana a cuminsa transmiti e weganan di Copa di Europa y anochi pa 7'or a culmina e actividad aki cu e Trix and Flix directamente for di CMB honrando e heroenan di Prensa Deportivo. Sr. Javier Wolter managing Director di CMB tawata tin palabranan di aprecio pa e trabao balioso cu e fotografo, narador, periodista y comentaristanan aki a y ta haci pa promove deporte.

Den pasado hopi di nan cu recursonan limita tawata haci lo maximo pa promove deportistanan, hubentud y deporte. E prome cu a ricibi su reconocimento tabata Janchi Tromp, e publico a dune un fuerte aplauso y por a nota lagrima den wowonan di Janchi ora cu el a tene su reconocimento den su mannan. Janchi ta simbolisa awe e esfuerzo y dedicacion cu un profesional di comunicacion ta duna pa contribui na su pais. El a saca potret, nara weganan deportivo y alaves filma y redacta noticia. E tabata un "all around man" di Prensa Deportivo.

Despues a sigui reconocimento di Sr. Andesito Adolfo Korzendijk Periodista Deportivo, Robby Burleson Periodista y Fotografo Deportivo, Cadochi Kock Narador Deportivo, Djiespi Franken Fotografo y Periodista Deportivo, Harold Faro Periodista y Comentarista Deportivo, Dochi Lee, Narador y Comentarista Deportivo, Claret Lopez y Eddy Daou e popular Duo di transmisionnan di baseball durante un epoca grandi y bunita di nos deporte di baseball y awe nan ta comentarista deportivo tambe, Leo Vrolijk Fotografo y Camarografo Deportivo, Juancito "Trucupe" Giel Narador Deportivo, Jenny Loefstok, Comentarista Deportivo, Frankie Kuiperi Narador y Comentarista Deportivo. Na esnan cu a bay lago nos CMB a invita nan famianan pa ta presenta na e ocasion special aki y asina famianan di Sr. Tico Kuiperi Q.E.P.D. Narador y Comentarista Deportivo, Sr. Pedro Maduro Q.E.P.D. Fotografo y Periodista Deportivo, Fan Fa Croes Q.E.P.D. Narador y Comentarista Deportivo y Sr. Ramiro Tromp Q.E.P.D. Periodista, Fotografo a acudi pa ricibi e reconocimIento corespondiente.

A sigui un cocktailparty ameno caminda cu tur hende a sigui combersa di futbol, deporte y hopi mas. Amigonan di hopi tempo a topa otro y tawata conta di nan temponan di trabao y cosnan di bida cu nan a pasaaden durante nan carera. Un caluroso pabien ta bay un biaha mas na tur e Heroenan di nos Prensa Deportivo y cu nan nomber y trabao lo keda pa semper recorda den e Salon di Fama di Museo di Deporte di Aruba.

CMB ta spera cu den futuro por reconoce otro grandinan di nos Prensa Deportivo y tambe talentonan nobo di awendia.