Joy y Bill Carson ta bisa: ARUBA DANKI!

Joy y Bill Carson ta bisa te oro y yama Aruba danki pa e aceptacion grandi cu nan a haya durante e ultimo 20 aña. E conocido bankero lo baha cu pension y abadona Aruba mitar di Juli pa bay biba na Canada y Florida.

Bill Carson a cuminsa su carera den banco 45 aña pasa cu ScotiaBank na Montreal, Canada. Despues di 15 aña trahando na Canada e la bay internacional pa 30 aña largo cual tur den Caribe. E la traha 3 aña na Barbados, 5 aña na Sint Maarten, 2 aña na Trinidad y Tobacco y 20 aña na Aruba.

Diaranson anochi Joy y Bill Carson a wordu honra y reconoci pa e 260 coleganan di CMB cu un celebracion di despedida na e restaurant Ventanas del Mar na e club house di Tierra Del Sol.

Durante e anochi tabata tin momentonan masha emocional na unda e coleganan claramente a expresa nan cariño y aprecio cu nan tin pa e pareha Carson. Tambe presente tabata nan yui Justin cu a lanta na Aruba y awor ta un profesional trahando na Aruba den e sector di hoteleria.

Joy y Bill Carson no ta bisa ayo pero te oro na Aruba ya cu nan lo keda bishita Aruba y nan yui cu frequensia.